Son profesional
Praceiro/a, xerente ou asociación.
O día a día do posto
Obrigas do titular do posto
Como profesional dun mercado municipal debes cumprir as condicións establecidas na autorización ou concesión do teu posto, así como o regulamento municipal do mercado e a normativa aplicable á túa actividade.
Entre as obrigas habituais atópanse:
- Respectar os horarios
- Manter o posto en boas condicións de limpeza e conservación
- Cumprir as normas sanitarias
- Ofrecer información clara sobre os produtos e os seus prezos
Cada mercado pode contar cunha regulación específica, polo que é importante coñecer as normas aprobadas polo concello.
Mostrar os prezos dos produtos
Con carácter xeral, as persoas consumidoras deben poder coñecer os prezos dos produtos de maneira clara, visible e comprensible antes da compra, conforme á normativa aplicable.
Mellorar o posto
-
Vender outros produtos
Depende das condicións da túa autorización ou concesión e do regulamento municipal. Os postos adoitan estar vinculados a unha actividade ou categoría comercial determinada, como peixaría, carnizaría, froitaría ou alimentación especializada.
Se queres ampliar ou modificar a túa oferta, consulta previamente co concello se é necesario solicitar unha autorización.
-
Reformas e modernización
En xeral é posible introducir melloras no equipamento, na imaxe ou na distribución do posto, sempre que sexan compatibles coa normativa aplicable e coas condicións da autorización ou concesión.
Antes de realizar obras ou modificacións nas instalacións, consulta co concello para coñecer os permisos necesarios e evitar actuacións non autorizadas: quizais precises licenza ou enviar unha comunicación de obra.
Gañar clientela
Atraer novos clientes
Unha boa presentación dos produtos, unha atención próxima e profesional e unha oferta adaptada ás necesidades das persoas consumidoras son fundamentais.
Tamén podes:
- Participar nas campañas de promoción do mercado
- Dar a coñecer os teus produtos nas redes sociais
- Preparar ofertas especiais
- Desenvolver novos servizos, como encargas anticipadas e lotes de compra
Diferenciación do posto
A especialización, a calidade, a frescura dos produtos, o coñecemento profesional e a atención personalizada son algunhas das principais fortalezas dos mercados tradicionais.
Destaca aquilo que fai diferente o teu negocio:
- A procedencia dos produtos
- A elaboración propia
- A selección de produtos de tempada
- As recomendacións de preparación
- O trato directo coa clientela
Pequenos cambios na presentación dos produtos, na comunicación ou na atención poden contribuír a mellorar a experiencia de compra.
Formarse e colaborar
Recursos formativos
Existen diferentes recursos formativos promovidos polas administracións públicas, asociacións empresariais, cámaras de comercio e outras entidades.
Ver a Formación-
Formación continua
Os hábitos de compra e as necesidades das persoas consumidoras evolucionan constantemente. A formación permite adquirir novas habilidades, mellorar a organización do negocio e incorporar servizos que faciliten a actividade comercial.
-
Campañas de dinamización
As campañas comerciais, actividades gastronómicas, degustacións, obradoiros e accións promocionais permiten atraer visitantes e reforzar a identidade do mercado.
Consulta co concello ou coa asociación de comerciantes as iniciativas previstas e propón novas actividades. A participación das persoas praceiras é fundamental para conseguir campañas atractivas e útiles.
-
Boas prácticas comerciais
Son actuacións que contribúen a ofrecer un servizo de calidade e a mellorar o funcionamento diario do posto.
Inclúen:
- A limpeza e a orde
- A presentación coidada dos produtos
- A información clara sobre os prezos
- A atención profesional
- O cumprimento das normas sanitarias
- Unha xestión responsable dos recursos
-
Vantaxes das asociacións
As asociacións permiten representar intereses comúns, facilitar a comunicación co concello, organizar campañas conxuntas e promover iniciativas para mellorar a actividade comercial.
Traballar colectivamente pode facilitar a resolución de problemas compartidos e favorecer unha maior participación nas decisións que afectan ao mercado.
O relevo do posto
-
Traspaso do posto
A transmisión dun posto municipal non funciona necesariamente como a dun establecemento privado. Dependerá do título que habilita a súa ocupación, do regulamento municipal e da normativa patrimonial ou contractual aplicable.
Antes de chegar a un acordo con outra persoa, debes consultar co concello as posibilidades e condicións legais de transmisión. É posible que estea establecida mediante ordenanza reguladora unha contía mínima ou máxima.
-
Xubilación ou cese da actividade
Se estás pensando en cesar a túa actividade, debes comunicarllo ao concello e comprobar as condicións establecidas no teu título de ocupación. Tamén é importante coñecer os trámites fiscais, laborais e administrativos relacionados co cesamento.
Planificar este proceso con antelación facilita unha transición ordenada e permite coñecer as alternativas existentes para o posto. Consulta co concello se podes traspasalo aos teus herdeiros, traballadores ou terceiros interesados.
Mercados Excelentes
Beneficios do Selo
O Selo de Mercado Excelente é un recoñecemento oficial da Xunta de Galicia que distingue os mercados que cumpren determinados criterios de calidade, xestión, servizos e instalacións.
Para as persoas praceiras, a excelencia pode traducirse en mellores instalacións, maior visibilidade comercial, novas oportunidades de promoción e unha experiencia de compra máis atractiva para a clientela. Ademais, pode facilitar que o mercado acceda a determinadas liñas de apoio público, segundo os requisitos de cada convocatoria.
Papel das persoas praceiras
A participación das persoas comerciantes é fundamental. A excelencia non depende unicamente das instalacións municipais, senón tamén da calidade da actividade comercial, da atención á clientela, da presentación dos produtos e da colaboración entre os diferentes axentes do mercado.
Aínda non tes un posto nun mercado?
Descubre como emprender ou poñer en marcha a túa idea de negocio nunha praza de abastos galega.
Infórmate aquíPrecisas axuda?
Asistente automático con intelixencia artificial: pode equivocarse, comproba a información importante nas fontes oficiais. Non escribas datos persoais: as preguntas envíanse a un servizo externo para respondelas. Privacidade